L ancontro

Antrou, precurou ua mesa resguardada i santou-se. Habie outras pessonas, giente mais nuoba, mas naide arreparou nel. La moça que serbie, achegou-se i cumprimentou-lo.
– Oulá.
– Oulá!… arrespundiu botando ls uolhos a la moça guapa, mais que guapa dua beleza strourdinária que l deixou facinado. Tenerie algo mais que binte anhos. Alta, nin rúcia nin morena, cun ua boç maludiosa, que ampressionou Ourlando. L oulhar era de ternura, misterioso, deixando adabinar outras bibéncias para alhá daquel bar.
Quedou a buer ua cerbeija que pedira i demorou-se mais que l que prebira al antrar. Por bárias vezes oulhou pa la moça i, sin saber porquei, çpertou-le ua buntade einorme de le falar. Al salir, fui-se anté l balcon pa le dezir debagarico que manhana tornaba, a la miesma hora, para la ber.
– You starei eiqui, arrespondiu eilha.
Anquanto tornaba para casa, iba rebendo la rapaza de l bar. Tamien arreparara nas guapas piernas i nas tetas que amanaçában salir de l çutian.
Cumo pormetira, ne l die alantre alhá tornou a la miesma hora, i desta beç demorou-se mais do que algua beç el pansara. Cumbinórun que a soutordie la eirie a buscar al fecho de l bar, para dar um passeio i cumbersáren. I assi fui. Caminórun por bárias rues de la Baixa, oulhando palas montras i trocando sensaçones i recordaçones de las bidas de cada un. Marie Armanda, solo Marie, qu’era assi qu’eilha gustaba que la chamássen, nacira an un bairro probe de la cidade, i cedo coinçiu l trabalho quando fizo quinze anhos de eidade. Purmeiro, cun la mai nas lhimpezas, çpuis trabalhando an cafés i restourantes, todos eilhes modestos. Cun binte anhos de eidade, resolbiu por rezones de namorico, que eirie a durar mui pouco, ir a trabalhar a la nuite an bares, para poder tener mais algun denheiro. Habien passado siete anhos. Este era l treceiro bar an que trabalhaba, recebindo siempre perpuostas, qu’eilha por cuidado normalmente nun aceitaba, porque ampeçában siempre por cumbites que eirien a acabar nalgun quarto de houtel ou apartamiento. Tenie aceite salir cun Ourlando, nin sabie bien porquei, mas pareciu-le ser un home sufrido, i nisso habie muito d´eigual cun eilha Yá las piernas ampeçában a doler cula canseira quando Ourlando lhe dixo, cun ua boç mansa, que se eilha quejisse, poderien çcansar un pouco an casa del. Çpuis de le haber serbido ua buida, ficórun muito tiempo cumbersando na sala. Cada un deilhes, fui falando subre ls santimentos, suonhos i zeilusones. Falában sin amargura. Marie falou-le de ls amores que tubira, dua pormessa de casamiento, todo sien rancores, nua boç suable, carinosa, que als poucos iba amolhecendo a Ourlando. Este, ancostou-se um cachico mais i cuntinou dezindo que l zassossego que a las bezes l apoquentaba tenie a ber culs amores antigos, de qu’inda nun se zafazira. Aprossimou-se deilha i topou-le na mano que eilha nun tirou, bolbendo ls uolhos para eilha, acarinou-le la face, i santiu ua sensaçon de bulúpia a corré-le l cuorpo, que el quijo fastar.
Abraçou Marie, debagar, i beisou-la al de lhebe ne ls lábios que stában eili tan acerca. Marie arrespundiu de la miesma forma sin priessas, anquanto ls cuorpos se ajustában i streitában ls braços al redror de l cachaço. Fazírun amor cun sofreguidon cumo se stubíssen a scundé-se de alguien. Todo se passou mui debrebe, muitas einergies acumuladas splodírun an fúria.
Passórun a ancuntrar-se to lo dies, anté que nuoba biaije anunciada iba a apartá-los. Nunca habie sido tan defícele para Ourlando, ambarcado de la Marina Mercante, deixar l porto. Nessa nuite, las palabras tornórun-se mais debagarosas i scassas. Marie, mantenie-se calhada. S´eilha le tubisse falado an casamiento, Ourlando tenie aceite. El tamien nada le dixo.

Válter Deusdado