Tamien nun era perciso tanto
Bien sei que la buossa çpensa
Ye un lhugar sagrado,
I el antrou alhá drento
Sin l tenerdes cumbidado.
Mas tenerie chegado bien
Dá-le un baliente sermon
i el antenderie
que bós teniedes rezon.
L probe solo querie ber
Cumo l queiso de Ruolos ye,
mas por mor de la rateira
nun soubo cumo sabie.
You li la buossa stória,
Ua stória cun balor,
Agora meto-me cun bós,
Çculpai-me por fabor.
Nun bos anfadeis cumigo,
Ye solo ua brincadeira,
You tenie feito l miesmo
Cun la buossa rateira.
Nun conheço l queiso de Ruolos,
Que you tenga na lhembrança,
Mas debe ser mui buono
Senó nun l lhebábades pa la França.
La çpensa era buossa,
L queiso de Ruolos tamien,
Cula rateira de Bergáncia,
Cacestes-lo i fazistes bien.
Na çpensa mandais bós
i l queiso staba arrecadado:
Pra quei metiu l nariç
Adonde el nun fui chamado?
Teneis toda la rezon,
Bós nun l chamestes pa la mesa.
Toma alhá pra apranderes
A nun te meteres cula sendinesa!
Pus stais bien prebenida,
Toda chena de cunfiança:
Que se cúiden ls raticos,
Cula rateira de Bergáncia.
Assi miesmo ye que se fai,
Tenemos que mos defender,
L queiso era buosso
Bós ye que teniedes que l comer.
Buono, ti Ana Paxareira,
Çculpai-me la cunfiança.
Deseio-bos muita suorte
I buona stadie an França.
José António Esteves
Lar de São José, Bumioso
