Xordo cumo un xeixo

– A cumo son las batatas? preguntaba-le el a la tie de las batatas de semiente an la feira de Caçareilhos.
– Meia nota cada saca.
– A cumo?!
– Ye la saca a cinquenta malreis!
– Quei?!!…
– Cada saca son cinquenta scudos!!
– Yá oubi trés bezes!!… Nun te atiras pouco al alto… la burra nun sós tu, ye quien te las merca … mirai meia nota por ua saca de batatas!… stá-te linda … anton la chicha naide le chega! Nun las lhiebo, anda que you alhá me hei de remediar cun las que tengo an la tulha, que yá ban bien grilhadas … mas se quejires binte cinco malreis por essa saquita más pequeinha que tenes ende…
Nun serie por bias de ser xordo que tiu Fachandin se botaba a perder.
Doutras bezes si parecie que nun oubie nada: dua beç que iba camino de l Prado, cun las bóias de l teson a spreitar pulas bordas de l baldo de l ciguonho, percura-le tiu Albardeiro, outro que passaba por ser tan xordo cumo el:
– Anton ides-bos a saber de uas xardicas ó duns scalhos al poço de ls Manadeiros, ah tiu Jesé? que chamá-le Fachandin a tiu Jesé Fracisco Morais Guerra nun yera para un qualquiera, nien para qualquiera altura.
– Nó, bou-me a la pesca alhá pa ls Barradeiros!
– Ah… cuidei que íbades a la pesca… Cumo lhebais l teson ende de fuora!…
Yera de un se rir! Mas nun podie ser muito a las scáncaras, que tiu Fachandin nun yera assi mi buono de dar l pelo.
La de andar a saber de la burrica branca, a cabalho anriba deilha, to la giente la coincie, i cuntaba-se muita beç puls puiales, mas la de la santica nun se le podie amentar neilha que se ponie cumo un bicho.
Un mei-die, anquanto sorbie l caldo de la malga, diç-le la sue Eirminda:
– Ah Jesé, onte si trazies un santica bien guapa ne l bolso de la jiqueta! Tirei-te-la dalhá i pus-la anriba de l’arca de la sala. Yá esta purmanhana le rezei ua Salb’Rainha para me anquemendar!…
Nien acabou l caldo. Alhebantou-se camino de la sala i alhá staba l altar anriba de l’arca: la sota, ancaixilhada por dues belas i stribada nua copica chena de auga cun ua ranqueirica de marianas de ls cacos de l barandin. Pus ye berdade! Tiu Fachandin tenie muitas, mas yera home de respeito ne l pobo. Regidor i capador, inda peç que l stou a ber – aquilho yera cumo quemer ua manada de antremoços – a meter l lhareguico antre ls zinolhos, i zapa, zapa, inda tenie la nabalha más aguçada que la nabalha de la barba de l Pelas, apuis yera solo ir por un caçoulico de auga de malbas, por bias de nun anfetar ls arregunhos, i yá staba, aquel yá nun quedaba para burron.
La redadeira beç que se me lhembra de star cun el fui ne l puial de l soto de tie Quelmentina, por un fin de berano, apuis de la Eiras stáren zacupadas de ls bornales de l pan, un tagalho d’eilhes de cumbersa, quando nó, sal-se tiu Fachandin:
– Raistaparta, Balmiro, que fediondo sós! Puodes ampeçar a fazer pul’alma que l cuorpo yá l tenes antregue. Que mal cheiras lhadron!
– Bó! Bós quei dezis, tiu Jesé?…
– Si, home, que you sou xordo, mas fário bien. Nun sei se fui barreno, se fui sfono, mas sós pior que un boubielho…cheira eiqui mal que pesta!
Ampecemos todos a fungar uas risicas, i zancampa a fugir l garoto de Eiduardo Gabetas, un angaço mal amanhado de siete ou uito anhos, se se tumbaba de las calças abaixo, zgraçaba-se, i bai, anton, scantarolando:
De antre dues fragas farozes, sal un bicho dando bozes, nien l bistes nien l bereis, solo pul cheiro l sentireis!

Alfredo Cameirão