L poeta popular

Pouco fui a la scuola
Culas bacas me mandou
Por isso só pude aprender
L que la bida m’ansinou.

Muito oubrigado a todos
Cousas buossas you sei bien
A dezir oubrigado
Al menos isso you aprendi

Scuitei eiqui un pouco
Mais eilhi outro pouquito
Agora naide quier saber
L que sabe l tuntico.

Sou assi un eignorante
Agora sabeis un mistério
Digo las cousas a rir
A quien me minte a sério

Fui assi aprendendo
Cousas que pienso sei
Cousas de pouca monta
Que pula bida scuitei.

Alguns que yá me conheceis
Dezde que era un rapazico
Agora stareis a dezir
L que aprendiu l chochico.

Guardei-las todicas juntas
No miu libro de registro
Por isso agora só sei
Pouco mais do que isto.

Se calha you nada sei
I nun bos puodo respunder
Son cousas que sálen
Quando stou a screber.

A las bezes pienso que sei
I nun ancontro l filo de la meada
Pra bos dezir la berdade,
L poeta nun sabe nada.

Termino cun çculpas
Pula mie atitude
Deseio-bos buona suorte
I muita muita salude.

La giente querie que saba
Nun sei que fui you que fiç
An dezirdes que el sabe
Cun isso fico feliç.

I para quien quejir
Deixo-le eiqui un besico
Adius anté outra beç
Buolbo yá nun anstantico.

José António Esteves – Lar de S. José, Bumioso