Las castanhuolas de Tonhico

L pai botou neilhas muita fé i muito ampeinho, puis querie q'esta prenda d’anhos quedasse guapa. Quedórun tan bien feiticas, tan bien feiticas que to la giente reparaba neilhas. Ls amigos preguntában-le:
- Para quien son essas castanhuolas?
L que el respundie ye que éran pa l sou rapaç, Tonhico, cumo prenda d’anhos. I acrecentaba:
- Bou-las a deixar tan bien feitas, que nun bai a haber por ende outras armanas.
Siempre Tonhico sonhou an tener uas castanhuolas. Agora que bie l pai tan apegado al trabalho, l sou suonho staba eilhi a la sue frente. Cumo quedou cuntentico cun sues castanholicas!
L die que las recebiu, tocou, tocou, anté se cansar, i quedou cua proua tan grande, tan grande que naide querie acraditar. Eilhas sonórun tan bien, tan bien, que yá muitos anhos nun se bie cousa eigual. Ls amigos que las oubírun, quedórun cun tanta ambeija, que le pedírun a Tonhico para cuntinar a tocar.
Mas duns tiempos a esta parte, las castanhuolas de Tonhico tenien ua bida muito triste. Quedórun squecidas, colgadas nun çpinduradeiro atrás de la puorta de casa. Nin la cumpanhie de la fisga, de l pion i l baraço las animaba. Parecie que Tonhico yá nun gustaba deilhas.
Las castanhuolas siempre que bien l sou amo a salir, quedában cun sperança. Mas quedában siempre squecidas, anquanto la fisga i l pion íban siempre a dar uas buoltas cun Tonhico.
Cumo era grande l sou delor! Eilhi quedában, falando ua cul'outra, molendo l tiempo. Dezie ua pa l' outra:
- Olha armana, que suidades you tengo doutros tiempos quando Tonhico mos lhebaba a las fiestas i ende teniemos la cumpanhie de l rigaleijo, de la fraita i todos ls moços i moças beilando, anté nun poder mais!
Un die pula manhana, quando Tonhico se porparaba para salir, l pai dixo-le:
- Bamos a la fiesta. Nun te squeças de lhebar las tues castanhuolas que tous primos siempre gustórun que tu las tocasses.
Tonhico çpindurou-las, porparou ls lhaços, puso-las ne ls dedos, lhebantou ls braços i, cun géstios ciertos, tocou-las. Fui ua marabilha. Las castanhuolas quedórun tan felizes, tan felizes, que tocórun tan bien cumo nunca habien tocado.
Faustino Antão